“Mançester Siti” istənilən futbolçu üçün yaxşı seçimdir” – Qvardiola

İngiltərənin “Mançester Siti” klubunun baş məşqçisi Pep Qvardiola komanda ilə bağlı açıqlama verib.

Komanda.az klubun mətbuat xidmətinə istinadən xəbər verir ki, “şəhərlilər”in vəziyyəti ilə bağlı danışan ispan mütəxəssis, yeni futbolçulara ehtiyac olduğunu bildirib:

“Yeni transferlərlə bağlı müəyyən fikirlərim var, amma bunları heç kimlə bölüşmürəm. Çünki mövsümboyu bu haqda düşünə bilmərəm. Yenilik etməliyik, çünki David Silva komandadan ayrılacaq. Bəzi mövqelərdə dəyişiklik edəcəyik, amma komandaya nə qədər yeni futbolçunun gələcəyini bilmirəm. Transfer bazarında aktiv olmaq həmişə çətindir. Qarşıda hələ 2-3 ayımız var. Düşünmürəm ki, futbolçuların “Mançester Siti”yə gəlməsi üçün yeganə səbəb mənim burda olmağımdır. Klub kifayət qədər böyük və yaxşıdır. Məndən əvvəl də komanda yaxşı vəziyyətdə idi. Klub Manuel Pelleqrini və Roberto Mançininin rəhbərliyi altında yaxşı oyun göstərdi, titullar qazandı. Bizə kömək edə biləcəyinə inanan futbolçulara ehtiyacımız var. “Mançester Siti” istənilən futbolçu üçün yaxşı seçimdir”.