“Daha 5 qələbəyə ehtiyacımız var” – Alleqri

İtaliya A Seriyasının son turunda “Cenoa”ya 0:2 hesabı ilə məğlub olan “Yuventus”un baş məşqçisi Massimiliano Alleqri oyundan sonra açıqlama verib.

Komanda.az İtaliya mətbuatına istinadən xəbər verir ki, 51 yaşlı mütəxəssis, məğlubiyyətin komandaya faydalı olacağını deyib:

“Fərqli bir “Yuventus” gözlənilirdi, yaxşı oyun göstərə bilmədik. Bəzi kritik səhvlər etdik. “Atletiko” ilə çətin oyun keçirmişdik və bu bizə yorğunluq verdi. İlk hissədə daha yaxşı idik, amma ikinci hissədə oyundan qopduq. Ən azından, məğlub olmaq üçün doğru oyunun olduğunu düşünürəm. Çünki milli komandalara görə yaranacaq fasilədə istirahət etmək üçün vaxtımız olacaq.

Hər oyunu ən yaxşı şəkildə keçirə bilməzsiz. Bu məğlubiyyət bizə daha yaxşı təsir edə və komandanı oyandıra bilər. “Onsuz da çempionluğu qazandıq” deyə düşünürdük, amma vəziyyət belə deyil. Çempionatda daha 5 qələbəyə ehtiyacımız var”.