Limitə “yerləşməyən” Mahir Emreli və başqaları

Kürşad

Azərbaycanın futbol camiəsi – məşqçilər, jurnalistlər, futbolçular, hətta azarkeşlər də legioner limitinin ləğv ediləcəyi xəbərinin “təsir”indən çıxa bilmirlər. “Legioner limiti ləğv edilsə, Azərbaycan futbolu məhv olacaq” deyən kim, “Limitin ləğvi azərbaycanlı futbolçuları bədbəxt edəcək” yazan kim.

Yazılanları oxuyanda, deyilənləri dinləyəndə adama elə gəlir ki, legioner limitinin ləğvi yerli futbolçulara limit tətbiq edilməsi anlamı daşıyır. Bəlkə, doğrudan legioner limitinin ləğvinə qarşı “silahlanan” insanlar belə düşünürlər? Vallah da elə deyil, billah da elə deyil. Legioner limitinin ləğvi “güclü olan oynasın” deməkdir. Yerli futbolçuların nazı ilə oynamamaq deməkdir.

Hə, bəzi yoldaşlar iddia edirlər ki, legioner limitinin ləğvi ilə klublar heyətlərini lazımsız, keyfiyyətsiz əcnəbi futbolçularla dolduracaqlar. Ola bilər… Bura İngiltərə deyil, Azərbaycandır. İngiltərədə Erlinq Haland, Məhəmməd Salah kimi yüksək səviyyəli legionerlər də var, Kayl Uolker, Bukayo Saka kimi adından çoxdan söz etdirən yerli futbolçular da. Yəni, hər ölkənin, çempionatın gücü, reytinqi var. İngiltərəyə halandlar, salahlar gəlirsə, Azərbaycana da eyni səviyyədə legionerlərin gəlməsini tələb edə bilmərik axı. Azərbaycana gəlsə gəlsə, Məmmədlə, Əhmədlə, Əli ilə, Vəli ilə heyət uğrunda rəqabət apara biləcək aşağı “ranqlı” əcnəbilər gələcək. Siz də deyirsiz ki, yox e, Məmməd, Əhməd, Əli, Vəli özümüzünküdür, səviyyələri aşağı da olsa, daim heyətdə yer almalıdırlar, oynamalıdırlar. Niyə də, niyə?

Almaniyanın “Nürnberq” klubunun baş məşqçisi Miroslav Kloze komandasının azərbaycanlı hücumçusu Mahir Emreli haqda təxminən belə deyib ki, “bu oğlana uşaq vaxtı futbol oynamağı tam (və ya düzgün!) öyrətməyiblər”. Azərbaycanın ƏN YAXŞI futbolçulardan biri haqda deyib e bunu şanlı-şöhrətli keçmişə sahib olan Kloze! Gedin, Mahir Emrelinin və onun kimi düzgün yetişdirilməyən onlarla, yüzlərlə başqa azərbaycanlı futbolçunun dərdini çəkin, legioner limitinin dərdini çəkməyin. Bu qədər dərd sizə ağır gələr.