“Eriksen kimi futbolçular “Tottenhem”də qalmaq istəmirlər” – Mourinyo

Son olaraq “Mançester Yunayted”in “sükanı arxasında” çalışmış Joze Mourinyo “Tottenhem”lə bağlı açıqlama verib.

Komanda.az İngiltərə mətbuatına istinadən xəbər verir ki, Premyer Liqanın son turunda “Arsenal”la 2:2 hesablı bərabərliyə razılaşan klubla bağlı danışan portuqaliyalı mütəxəssis, bunları deyib:

“Düşünürəm ki, “Tottenhem” keçən mövsümün son hissəsində Premyer Liqada qalib gəlmək şanslarının olmadığını anladı. Onlar “Mançester Yunayted” və “Çelsi” kimi komandalardan da böyük təzyiq hiss etməmişdilər. Əsas istəkləri də ilk 4-lüyə düşmək idi. Bəlkə də, onlar daha çox avrokubok oyunlarına kökləndilər. Amma məncə, bu mövsüm komandanın həmin birliyi yoxdur.

Yeni futbolçu transfer etməsələr də, komandadakıları qorumaq onlar üçün daha vacibdir. “Tottenhem” futbolçularını komandada qalmağa razı sala bildi, əsas futbolçuları ilə yeni müqavilə imzaladı. Onların bu klubda xoşbəxt olduqları görünür. Lakin Kristian Eriksen kimi futbolçular “Tottenhem”də qalmaq istəmirlər. “Tottenhem”in inanılmaz stadionu, Çempionlar Liqasında göstərdiyi möhtəşəm “performans”ı var, amma bəlkə də, bu futbolçular fərqli məqsədlər istəyirlər”.