Kadinin “Krasnodar”da alacağı maaş bilindi

Rusiyanın “Krasnodar” klubu “Qarabağ”dan Kadi Borgesi transfer etdiyini açıqlayıb.

Komanda.az xəbər verir ki, braziliyalı oyunçu tibbi müayinədən keçdikdən sonra onunla 2026-cı ilin iyununa kimi müqavilə imzalanacaq. Kadinin Dubayda keçiriləcək təlim-məşq toplanışında komandaya qoşulacağı vurğulanıb.

Ancaq transferə görə “Qarabağ”a ödənilən məbləğ açıqlanmayıb. Bununla belə, “vedomosti.ru” saytı braziliyalı futbolçunun yeni klubunda illik maaşının 2 milyon avro təşkil edəcəyini yazıb.

Kadi “Qarabağ” formasıyla bu mövsüm 31 oyunda 8 qol, 11 məhsuldar ötürmə ilə yadda qalıb. O, Ağdam təmsilçisində ümumilikdə 74 oyunda iştirak edib. 28 qol vuran braziliyalı yarımmüdafiəçi elə 28 dəfə komanda yoldaşlarının fərqlənməsinə şərait yaradıb.