Konfrans Liqası: “Sivasspor”un futbolçusu həftənin ən yaxşısı seçildi

Avropa Konfrans Liqasında qrup mərhələsinin 5-ci turunun oyunlarından sonra həftənin ən yaxşı futbolçusu bəlli olub.

Komanda.az xəbər verir ki, azarkeşlərin UEFA-nın rəsmi saytındakı səsverməsinə əsasən, bu ada Türkiyənin “Sivasspor” klubunun hücumçusu Mustafa Yatabare layiq görülüb.

36 yaşlı forvard Rumıniyanın ÇFR komandasına doğma meydanda 3:0 hesabıyla qalib gəldikləri oyunda dubla imza atıb.

Konfrans Liqasında həftənin ən yaxşı oyunçusu adına Luka Yoviç (“Fiorentina”, İtaliya), Matias Oyevusi (“Jalgiris”, Litva) və Yari Versxaren (“Anderlext”, Belçika) də namizəd idi.