Konfrans Liqası: “Neftçi”nin potensial rəqibi bilinəcək – bu gün

Bu gün UEFA Konfrans Liqasında pley-off mərhələsinin püşkü atılacaq.

Komanda.az xəbər verir ki, saat 16:00-da başlayacaq tədbirdə Azərbaycanın turnirdəki yeganə təmsilçisi “Neftçi”nin də rəqibi məlum olacaq.

“Ağ-qaralar” 3-cü təsnifat mərhələsində Avstriyanın “Rapid” (Vyana) komandasını keçəcəyi təqdirdə, səpələnməmişlər səbətində yer alacaq. Potensial rəqiblər isə Fransanın “Nitsa” komandası, “Hayduk” (Split, Xorvatiya) / “Vitoriya” (Portuqaliya) cütünün qalibi, “Vaduts” (Lixtenşteyn) / “Konyaspor” (Türkiyə) cütünün qalibi və “Vikinq” (Norveç) / “Sliqo Rovers” (İrlandiya) cütünün qalibi olacaq.

Pley-off mərhələsinin ilk oyunu avqustun 18-də, cavab görüşü avqustun 25-də keçiriləcək. “Neftçi”nin “Rapid”lə ilk görüşü avqustun 4-də evdə, cavab qarşılaşması avqustun 11-də səfərdə olacaq.