Klopp: “Arsenal”a uduzanda heç kim bizi favorit adlandırmırdı”

“Liverpul”un baş məşqçisi Yurgen Klopp komandanın hazırda çempionluq titulu uğrunda mübarizədə favorit sayılması ilə bağlı fikirlərini bölüşüb.

Komanda.az klubun rəsmi saytına istinadən xəbər verir ki, alman mütəxəssis hazırda onlar üçün vacib olan favoritlərin kimliyi deyil, “Şeffild Yunayted”lə matçın olduğunu bildirib:

“Hazırda bizim üçün vacib olan favoritlərin kim olması deyil, “Şeffild Yunayted”lə matçdır. “Arsenal”a uduzanda heç kim bizi favorit adlandırmırdı. Mən buna tam əminəm. Bunun doğru və ya yanlış olduğunu bilmirəm və bunun heç bir əhəmiyyəti yoxdur. Biz peşəkar olmalıyıq. Emosional olmalıyıq, amma düzgün şəkildə. Özümüzün ən yaxşı versiyamız olmalıyıq. Bacardığımız qədər yaxşı futbol oynamağa çalışmalıyıq və nəticənin necə olacağını görəcəyik. Heç bir zəmanət yoxdur, yalnız imkanlar var. Bir fürsəti nə qədər aydın görsəz, ondan istifadə etmək ehtimalınız bir o qədər yüksək olar. Hamısı budur”.

“Liverpul” İngiltərə Premyer Liqasının 29 turundan sonra “Arsenal”dan 1 xal geri qalaraq 2-ci pillədə qərarlaşıb.