Keçmiş qapıçı Şahruddini müdafiə etdi: “Kömək etməliyik”

“Qarabağ” dünən UEFA Çempionlar Liqasının 2-ci təsnifat məhləsində ilk oyununu keçirib. “Köhlən atlar” Polşa təmsilçisi “Rakuv”a 2:3 hesabı ilə məğlub olub. Komandanın qapıçısı Şahruddin Məhəmmədəliyev buraxılan ikinci qolda ettiyi ciddi səhvə görə mətbuat və azarkeşlərin qınaq obyektinə çevrilib. Xüsusən də, sosial şəbəkədə baş məşqçi Qurban Qurbanovun Məhəmmədəliyevə bu qədər güvənməsinin doğru olmadığı yazılır.

Azərbaycan millisinin və “Neftçi”nin keçmiş qapıçısı Hüseyn Məhəmmədov məsələ ilə bağlı Komanda.az-a açıqlama verib. Keçmiş qapıçı bildirib ki, indi hər kəs Məhəmmədəliyevə dəstək olmalıdır:

“Dünənki matç Şahruddinin karyerasında yaxşı olmayan oyunlardan biri idi. Amma buna baxmayaraq, futbolda belə hallar olur, olacaq da. Dünyanın ulduz qapıçıları belə, ciddi səhvlər edir. Bu o demək deyil ki, bu gün Şahruddin səhv elədi deyə, biz onu tənqid etməliyik. Bu, düzgün yanaşma deyil. Bu yolu keçmiş biri kimi mənim də futbolda gördüyüm şeylər var. Bu, olmalıdır, olacaq da. Heç kim səhvdən sığortalanmayıb. Sadəcə olaraq, biz onu tənqid etməməliyik, əksinə, motivasiya verməliyik. Məhəmmədəliyevə kömək etməliyik. Biz ona indidən gələcək oyunlar üçün dəstək olmalıyıq. Qarşıda yenə oyunlar var. Əlbəttə ki, biz indidən ona dəsətək olsaq, o, gələn oyunlarda daha inamlı şəkildə özünü göstərəcək.

Mən çox sevinirəm ki, Qurban Qurbanov bu məsələyə çox peşəkar yanaşır, öz futbolçularına dəstək olur. Özü bu yolu keçmiş bir şəxs kimi bilir ki, futbolçu hər zaman səhvlər edə bilər. Bu zaman futbolçuya psixoloji dəstək olmaq lazımdır. Şahruddin “Qarabağ”ın və millinin əsas qapıçısıdır. Bu gün biz ona belə vaxtda dəstək olmalıyıq, kömək etməliyik. Futbolçu karyeramızda hamımızın səhvi olub. Dəfələrlə Şahruddinin yaxşı oyunlarını görmüşük, komandaya kömək etdiyini bilirik. Şahruddin özü də bu barədə düşünəcək ki, daha inamlı və daha yaxşı olsun.

Yenə də deyirəm, bu gün hər birimiz Şahruddin haqqında fikirləşməli deyilik ki, o, səhv edib deyə, pis qapıçıdır. Bu fikir düzgün deyil. Çalışmalıyıq ki, Şahruddin Məhəmmədəliyevə belə məqamlarda dəstək olaq və qarşıdan gələn oyunlara kökləyək”.

Akif Əhmədov