“Belə şəraitdə yaxşı hakimlik etməmək üçün gərək hakim olmayasan” – Tahir Süleymanov

Keçmiş FİFA hakimi, “Neftçi” klubunun sabiq vitse-prezidenti Tahir Süleymanov Azərbaycan Premyer Liqasının 24-cü turu çərçivəsində keçirilən “Sabah” – “Neftçi” matçı (2:2) ilə bağlı fikirlərini bildirib.

Komanda.az saytına danışan Süleymanov, görüşün baş hakimi Vüqar Həsənli üçün mövsümün bitdiyini deyib:

“Azərbaycan hakimlik məktəbi dünyada ən yaxşılardan olub. Bu gün də bacarıqlı hakimlərimiz var və bundan sonra da olacaq. Yetər ki, onlarla düzgün iş aparılsın, inkişafları təmin edilsin. “Sabah” – “Neftçi” matçı haqqında son günlər çox danışılıb, epizodlar müzakirə edilib. Elə görüşlər olur ki, hakim 90 dəqiqədə bir yaddaqalan səhvə yol verir. Bu oyunda səhvlər davamlı idi. Bildiyiniz kimi, cəzalar açıqlanmır. İctimai təzyiqlərin azalması üçün AFFA hakimliklə bağlı araşdırma açıqlamasını da verdi.

Vüqar Həsənli üçün çempionatı erkən bitmiş saymaq olar. Əsas, səhvlərindən nəticə çıxarmasıdır. Psixoloji olaraq çempionatın sakit məcrada keçməsi hakimlərdə aşırı rahatlıq yaradıb. Səhvlər etməklə yanaşı, komandaların, futbolçuların xoş münasibətinin qarşılığını vermək əvəzinə üzərlərinə gedirlər, meydanda bəzi hallarda özlərini cəllad kimi aparırlar. Hakim ilk öncə psixoloji hazırlıqla yanaşı, meydanda pedaqoq olmalıdır. Türkiyədə məşqçiyə də, hakimə də hörmət mənasında hoca deyilir. Hakimlər oyunlarda müəllim olduqlarını unutmamalıdırlar!”

Tahir Sülyemanov Azərbaycan Premyer Liqası matçlarının idarəçiliyi haqda da fikirlərini bildirib:

“Çempionata hakim idarəçiliyi baxımından yanaşılsa, son illər ən rahat çempionatlar keçirilir. İddialı klubların sayı minimuma enib, bölgə komandaları dağıdılıb, əvvəlki illərdəki kimi rəqabət, ajiotaj, dolu tribunalar, hakimlərə psixoloji təzyiq yoxdur. Müasir stadionlar, təhlükəsizlik tədbirləri yüksək səviyyədədir. Klubların çoxu AFFA xətti ilə maliyyələşir, komandaların əksəriyyətinə nə məsləhət görülsə, əlaltı klub rəsmiləri tərəfindən “baş üstə” cavabı alınır. Belə şəraitdə yaxşı hakimlik etməmək üçün gərək hakim olmayasan. Hətta bu durumda belə, idarəçiliklə bağlı haqlı etirazlar səslənir, oyunlarda qalmaqallar yaşanır. Bəzi matçlardakı idarəçiliklə əvvəlki illərdə hakimlər meydançanı, stadionu tərk edə bilməzdilər”.

Keçmiş referi, hakimliklə bağlı problemlərə cavabdehin AFFA Hakimlər Komitəsinin olduğunu bildirir. Süleymanov, avstriyalı Frits Stuxlikin qurumun yeni sədri olmasından sonra da hakimlərin işində ciddi irəliləyiş olmadığını deyir:

“Hər bir sahənin cavabdehləri var. Problemə hansısa bir oyundakı hakim səhvləri prizmasından yanaşmaq doğru olmaz. Qış fasiləsindən öncə də narazılıqlar var idı, indi də davam etməkdə, çoxalmaqdadır. Kubokda bəzi klublar hakim haqsızlıqları ilə üzləşib kənarda qaldılar. Çempionat finişə doğru istiqamət aldıqca, hər xalın önəmi artdıqca, oyunlara hakim təsiri də çoxalır.

Hakim və İnspektorlar Komitəsində dəyişiklik baş verdikdən sonra heç bir ciddi irəliləyişə nail olunmayıb. Struktur dəyişikliyi tənzimlənsə də, yaradılan şəraitdən istifadə edilməyib. Komitəyə rəhbər gətirilən avstriyalı Stuxlik bu illər ərzində ancaq özünü düşünüb. Hiss olunur ki, kollektivdə sağlam atmosfer də çatışmır. Nəsil dəyişməsi təbii rəqabət şəraitində yox, fərqli kriteriyalarla aparılır. Təcrübəli hakimlərə bu qədər etinasızlıq göstərmək yolverilməzdir. Rəqabət nə qədər aşağı düşsə də, aparıcı, güclü klubların sayı azalsa da, çempionatı eksperimentlər məkanına çevirmək yanlış addımdır. Gəncləri birdən-birə məsul oyunlara təyin edib yandırmaq olmaz. Belə hallar oyunlarda çox baş verib. Bəzi hakimlər sınıb, bəziləri səhvlərdən, tənqidlərdən nəticə çıxarıb.

Böyük futbolda xırdaçılıq olmur. Oyunlarda tanımayanlar və ya ekran qarşısında əyləşənlər 4-cü hakimləri seçməkdə çətinlik çəkirlər. Hakimlər texniki zona ətrafında klub nümayəndələrindən seçilmirlər. Formalarda adi “AFFA” sözü belə, yazılmayıb. Federasiyanın pulu tükənib? Stuxliklə bağlanılan müqavilənin bir faizi bu tipli məsələlərin həll üçün kifayətdir. Pandemiya ilə bağlı son bir ili çıxmaq şərtilə, təlim-məşq toplanışları da lazımi səviyyədə keçirilmir. Təəssüf ki, avstriyalının dilimizə, mentalitetimizə münasibəti, Avropa “mədəniyyət”ini futbola gətirməsi bir başqa bəladır. Yəqin bu “keyfiyyətlərinə” görə bitmiş müqaviləsi uzadıldı”.

Şahin Cəfərov