Keçmiş futbolçu “Liverpul”un hücum xəttini tənqid etdi

“Liverpul”un sabiq müdafiəçisi Cimi Karrager İngiltərə Premyer Liqasının 18-ci turunun “Arsenal”la oyununda (1:1) keçmiş komandasının hücum xəttinin çıxışını tənqid edib.

Komanda.az “Sky Sports”-a istinadən xəbər verir ki, o, bununla bağlı belə deyib:

“Liverpul”un üç hücumuna baxaraq demək istəyirəm ki, burada səhv bir şey var. Kodi Qakpo bir ilə yaxındır ki, komandadadır və yaxşı oyun nümayiş etdirib. Lakin bu, kifayət deyil. Keçənilki diz zədəsindən sonra Luis Diaz əvvəlki halının solğun kölgəsi kimi görünür. Mən həqiqətən hiss edirəm ki, o, mövsümün ikinci yarısında özünü sübut etməlidir, əks halda “Liverpul” yayda transfer bazarına çıxacaq.

Darvin Nunyesin oyuna ehtiyat oyunçular skamyasında başladığını və qol baxımından pis vəziyyətdə olduğunu bilirəm. Amma Nunyes komandanın siyahısında birinci yerdə olmalıdır. Yaxşı, Məhəmməd Salah sənin bir nömrəndir, Nunyes ikinci nömrəndir, bəs ön üçlükdə başqa kim oynayacaq?!”

Salah hazırda “Liverpul”un ən məhsuldar oyunçusudur. Misirli futbolçu bütün turnirlərdə 25 matçda iştirak edib, 16 qol vurub və 8 məhsuldar ötürmə edib.