“Kəpəz”lə “Şamaxı” təcili yardıma görə cərimələndi

Bu gün AFFA İntizam Komitəsinin iclası keçirilib.

Komanda.az xəbər verir ki, iclasda aşağıdakı qərarlar qəbul edilib.

Misli Premyer Liqasının 5-ci turunun “Şamaxı” – “Turan Tovuz” oyununda Şamaxı şəhər stadionunda təcili tibbi yardım maşınının oyuna gecikməsi səbəbindən “Şamaxı” klubu 800 manat cərimə olunur.

5-ci turun “Sabah” – “Səbail” oyununda “Sabah”ın azarkeşləri tərəfindən meydançaya kənar əşyalar atıldığı üçün “Sabah” klubu 1600 manat cərimə olunur.

5-ci turun “Kəpəz” – “Qarabağ” oyununda Qəbələ şəhər stadionunda təcili tibbi yardım maşınının oyuna gecikməsinə görə “Kəpəz” klubu 800 manat cərimə olunur. Qəbələ şəhər stadionunda “Qarabağ” azarkeşləri pirotexniki vasitələrdən istifadə etdiyinə görə “Qarabağ” klubu 800 manat cərimə olunur. “Kəpəz”in futbolçusu Tural Rzayev ciddi qayda pozuntusuna görə birbaşa qırmızı vərəqə alaraq meydançadan kənarlaşdırıldığı üçün 2 oyun cəzalanır, klub 1600 manat cərimə olunur.

1-ci divizionda 3-cü turun “Turan Tovuz-2” – “Sumqayıt-2” oyununda “Sumqayıt-2” komandasının futbolçusu İlnur Valiev rəqibi aşkar qol imkanından məhrum etdiyinə görə 1 oyun cəzalanır, klub 20 manat cərimə olunur.

3-cü turun “Mingəçevir” – “Qarabağ-2” oyununda oyundan sonra azarkeşlərin meydançaya daxil olmasına görə “Mingəçevir” klubu 160 manat cərimə olunur. “Mingəçevir” – “Qarabağ-2” oyununda AFFA nümayəndəsi, hakim və inspektor üçün stadionda otaq təqdim olunmadığına görə “Mingəçevir” klubu 80 manat cərimə olunur. “Mingəçevir” – “Qarabağ” oyununda “Mingəçevir”in 4 futbolçusu sarı vərəqə ilə cəzalandırıldığına görə klub 80 manat cərimə olunur. “Mingəçevir”in futbolçusu Rüstəm Nuruyev ikinci sarıdan qırmızı vərəqə alaraq meydançadan kənarlaşdırıldığı üçün futbolçu 1 oyun cəzalanır, klub 20 manat cərimə olunur.

3-cü turun “Qaradağ Lökbatan” – “Zaqatala” oyununda təhlükəsizlik xidmətinin əməkdaşı iclasda iştirak etmədiyinə və oyunun başlanmasına 45 dəqiqə qalmış stadiona gəldiyinə görə “Qaradağ Lökbatan” klubu 40 manat cərimə olunur.

3-cü turun “Səbail-2” – “Neftçi-2” oyununda “Səbail-2” komandasının 4 futbolçusu sarı vərəqə ilə cəzalandırıldığına görə klub 80 manat cərimə olunub.