“Kəpəz” kimi azarkeşi olan futbol komandası çox azdır” – Olimpiya çempionu

“Gəncənin həmişə güclü futbol məktəbi olub”.

Komanda.az xəbər verir ki, bunu sərbəst güləş üzrə olimpiya çempionu Toğrul Əsgərov “Kəpəz” televiziyasına açıqlamasında deyib.

Hazırda qadınlardan ibarət güləş yığmasının böyük məşqçisi olan Əsgərov “Kəpəz”in “Qarabağ” kimi avrokuboklarda ölkəni təmsil etməsini istədiyini söyləyib:

“İnşallah, bu yolda klub tərəfindən müəyyən addımlar atılır. Yeni baza tikilib, akademiya istifadəyə verilib, məktəb yaranır. Bu amillər komandanın inkişaf edəcəyini göstərir. Amma mütləq şəkildə kluba sponsor lazımdır. Maliyyə dayağı olmadan böyük ideyaları həyata keçirmək olmaz. Gəncənin həmişə güclü futbol məktəbi olub. Ona görə də, akademiyanın futbolun inkişafına çox böyük faydası olacaq”.

Toğrul Əsgərov yeni tikilən stadiondan da danışıb. O, azarkeşlərin uzun illər həsrətini çəkdiyi arenanın tamaşaçı sayının artmasına xidmət edəcəyini bildirib:

“Köhnənin yerində yeni stadion tikilir. “Kəpəz” kimi azarkeşi olan futbol komandası çox azdır. Azarkeş klub üçün böyük dəstəkdir. Klubun azarkeşinin olması rəqiblərlə mübarizəyə 1:0 öndə başlamaq deməkdir. İnanıram ki, yeni tikilən stadionda Gəncə azarkeşlərinin sayı daha da artacaq. Komandamız da uğurlu çıxış edəcək. Biz də nəticələrə sevinib hər zamankı kimi azarkeşlik edəcəyik”.