İspaniya millisində AÇ-2020 öncəsi koronavirus şoku

Futbol üzrə İspaniya millisinin kapitanı Serxio Buskets koronavirusa yoluxub.

Komanda.az xəbər verir ki, bu barədə İspaniya Futbol Federasiyasının rəsmi saytı məlumat yayıb.

32 yaşlı yarımmüdafiəçinin koronavirus testi müsbət çıxdığı diqqətə çatdırılıb. Digər oyunçuların testi mənfi olub. Buna baxmayaraq, komandanın mətbuat üçün açıq olan bütün tədbirləri ləğv edilib.

Busketsin karantinə alındığı bildirilib. Onun komandadakı taleyinə qarşıdakı günlərdə götürüləcək növbəti testlərin nəticəsi aydınlıq gətirəcək. “Barselona”nın təcrübəli futbolçusu iyunun 8-də keçiriləcək Litva ilə yoxlama görüşünü dəqiq buraxacaq. Futbolçunun İsveç millisinə qarşı AÇ-2020-nin açılış oyunundakı (14 iyun) iştirakı isə sual altındadır.

Qeyd edək ki, AÇ-2020 11 iyun – 11 iyul aralığında keçiriləcək.