“Bu, bizə böyük dərs olacaq” – Konte

“İnter”in baş məşqçisi Antonio Kontenin İtaliya kubokunun yarımfinal mərhələsinin “Napoli” ilə cavab matçından sonra mətbuat konfransı keçirilib.

Komanda.az İtaliya mətbuatına istinadən xəbər verir ki, Konte, finala çıxmağa layiq olduqlarını deyib:

“Hər iki oyunun nəticəsindən sonra finala çıxmağa layiq idik. Futbolçularımı nəyəsə görə günahlandıra bilmərəm. Futbol aqressiv oyundur. Çoxlu şanslarımız oldu, daha sakit ola bilərdik. David Ospina da bir neçə yaxşı qurtarış etdi. Buraxdığımız qolda axmaq səhv etdik və məyus olduq. Bu, bizə böyük dərs olacaq.

Növbəti oyunlarda da “İnter”dən yaxşı oyun görmək istəyirəm. Oyunda 60 faiz topa sahib idik, daha çox zərbələr vururduq. Komandamdan çox razı qaldım və hiss edirəm ki, finala çıxmağa layiq idik. Futbolçularım finala vəsiqə qazanmadılar deyə, kədərləniblər”.

İlk oyunda rəqibinə 0:1 hesabıyla uduzan “İnter”, cavab matçında qollu bərabərə qalaraq kubokla vidalaşıb.