“İnter” “Tottenhem”in müdafiəçisini istəyir

İngiltərənin “Tottenhem” klubunun müdafiəçisi “İnter”in hədəfindədir.

Komanda.az İtaliya mətbuatına istinadən xəbər verir ki, “neradzurra” London klubunun 32 yaşlı futbolçusu Yan Vertongeni transfer etmək niyyətindədir. Milan təmsilçisi futbolçunu qış fasiləsində transfer etmək istəsə də, “Tottenhem” bununla razılaşmayıb. Buna görə də, “İnter” londonlularla müqaviləsi cari mövsümün sonunda başa çatacaq belçikalı futbolçunu yay transfer dövründə azad agent olaraq heyətinə qatacaq. “İnter”in futbolçuya 3 illik müqavilə təklif etdiyi bildirilir.

Eyni zamanda, “Tottenhem”in də Vertongenlə müqaviləni uzatmaq istədiyi, amma onunla uzunmüddətli müqavilə imzalamağa hazır olmadığı deyilir.

2012-ci ildən “Tottenhem”in şərəfini qoruyan Vertongen, cari mövsümdə bütün turnirlər daxil olmaqla 9 oyunda iştirak edib.