“İndi futbolçularımızda inam yoxdur” – Lempard

“Çelsi”nin baş məşqçisi Frenk Lempard İngiltərə Premyer Liqasının 34-cü turunun “Arsenal”la oyunundan əvvəl komandasının durumundan danışıb.

Komanda.az xəbər verir ki, ingiltərəli mütəxəssis mətbuat konfransında iştirak edərək, komandasının ən yaxşı dövründə olmadığını bildirib:

“Ən yaxşı dövrdə deyilik. Futbolun reallığı budur ki, karyera uğurdan ibarət ola bilməz. İşin bir hissəsi daha mürəkkəb məqamlardır. İstədiyimiz yerə qayıtmaq üçün bütün aspektlər üzərində işləməliyik.

İndi futbolçularımızda inam yoxdur. Heç kim itirməyi sevmir. Bununla oxşar anlarım olub. Sonra biz bir-birimizi motivasiya edərək, gərgin əmək sayəsində qalib gələ bildik”.

“Çelsi” bütün yarışlarda keçirdiyi son 5 matçda məğlub olub. Londonlular sonuncu dəfə mart ayında, Premyer Liqanın 27-ci turunda “Lester”i məğlub edib (3:1).