“İnter” və digər klublarla heç bir əlaqəmiz olmayıb” – Donnarummanın agenti

PSJ-nin qapıçısı Canluici Donnarummanın agenti Enzo Rayola mümkün ayrılıq şayiələri fonunda italiyalı futbolçunun Paris klubundakı gələcək karyerası haqda danışıb.

Komanda.az “Foot Merato”-ya istinadən xəbər verir ki, 25 yaşlı qolkiperin agenti bu istiqamətdə çox sakit işlədiklərini bildirib:

“Donnarumma PSJ və milli komandanın qapıçısıdır. Bir çox klublar tərəfindən böyük hörmətə malikdir, bu, təbiidir. Müqavilənin müddətini uzatmaq üçün əlaqə artıq ötən ilin yayında başlayıb və biz bu istiqamətdə çox sakit işləyirik. UEFA qaydalarına uyğun olaraq, klub, büdcəsində dəyişiklik edərək, maliyyə dönüşü edib. Biz PSJ-nin yeni müqavilə idarəetmə siyasətini qəbul etdik və onun müddətinin mümkün uzadılması üzərində işləyirik, ən yaxşı həll yolunu tapmağa çalışırıq. Ancaq hazırda heç bir tələslənlik yoxdur.

“İnter” və digər klublarla heç bir əlaqəmiz olmayıb. İnanıram ki, futbolçu bazara çıxarılsa, maraqlanan klubları tapmaqda problem olmayacaq. Önümüzdəki aylarda hansısa bir dəyişiklik olarsa, biz öz qiymətimizi deyəcəyik”.

Donnarummanın PSJ ilə müqaviləsinin müddəti 2026-cı ilin iyununa qədərdir. Mətbuatda yayılan xəbərlərə görə, “İnter” bu yay qapıçını almağa çalışacaq. Onun müqavilə müddəti bitdikdən sonra azad agent kimi başqa kluba keçməsi də mümkündür.

Donnarumma bu mövsüm PSJ-də 27 oyun keçirib.