İkardiyə təklif: İllik 11 milyon avro

“İnter”də mövsümün sonunda komandadan ayrılacağı iddia edilən Mauro İkardi karyerasını yenə İtaliyada davam etdirə bilər.

Komanda.az xəbər verir ki, argentinalı forvardla “Napoli” yaxından maraqlanır. Bu barədə İtaliya mətbuatı məlumat yayıb. Xəbərdə, “Napoli”nin İkardi üçün illik 11 milyon avro məvacib alacağı müqavilə təklif etdiyi bildirilib. 25 yaşlı hücumçu bu təklifi qəbul edəcəyi təqdirdə, “Yuventus”un futbolçusu Kriştiano Ronaldodan sonra İtaliyada ən çox qazanan futbolçu ünvanına sahib olacaq.

İkardi “Napoli”yə keçməyə müsbət yanaşsa da, “İnter” forvardı yüksək məbləğə satmaq niyyətindədir. “Yuventus”un da İkardiylə yaxından maraqlandığı iddia edilir.

“İnter”lə 2021-ci ilə qədər müqaviləsi olan İkardi, bu mövsüm 28 qarşılaşmada iştirak edərək, 15 qol vurub. Rəhbərliyin yeni sözləşmə təklifini qəbul etməyən forvardın kapitanlığı əlindən alınıb.