İdman Jurnalistləri Assosiasiyası De Byazidən üzr gözləyir

Azərbaycan İdman Jurnalistləri Assosiasiyası futbol üzrə Azərbaycan milli komandasının baş məşqçisi Canni De Byazinin azərbaycanlı jurnalistlər haqqında səsləndirdiyi fikirlərə etirazını bildirib.

Komanda.az xəbər verir ki, qurumun yaydığı bəyanatda bunlar qeyd olunub:

“Azərbaycan İdman Jurnalistləri Assosiasiyasının bəyanatı
Futbol üzrə Avropa Çempionatının seçmə mərhələsində Belçika ilə oyundan sonra meydandakı biabırçılıq bəs etmirmiş kimi, oyunsonrası mətbuat konfransında daha bir qəbuledilməz hadisə yaşanıb.

Milli komandamızın baş məşqçisi Covanni De Byazi idman jurnalistlərimizin haqlı və obyektiv suallarına kəskin reaksiya verib, onlara qarşı etikadankənar ifadələr səsləndirib.

Bu, italiyalı mütəxəssisin azərbaycanlı jurnalistlərə qarşı ilk belə davranışı deyil. Demək olar, hər mətbuat konfransında De Byazi jurnalistlərin suallarını doğru-düzgün cavablandırmaq əvəzinə yersiz mübahisə edir, ona səxavətlə qucaq açan İtaliyaya dost ölkənin media mənsublarına qarşı alçaldıcı davranış sərgiləyir.

Azərbaycan Futbol Federasiyaları Assosiasiyasının (AFFA) baş katibi Sərxan Hacıyevin baş məşqçinin bu cür münasibətinə görə idman jurnalistlərimizdən üzr istəməsi təqdirəlayiq addımdır.

Azərbaycan İdman Jurnalistləri Assosiasiyası Covanni De Byazinin nalayiq davranışına görə idman jurnalistlərimizdən üzr istəməsini, AFFA başda olmaqla aidiyyatı qurumlardan onun belə arzuolunmaz fəaliyyəti ilə bağlı təsirli ölçü götürməsini tələb edir”.