“Hazırkı rəqibimiz digərlərindən tam fərqlənir” – Qurban Qurbanov

“Qruplara düşmək üçün son sınağımızdır. Bu vaxtadək fərqli rəqiblərə qarşı oynadıq. Hazırkı rəqibimiz digərlərindən tam fərqlənir. Çexiya futbolu oyun nizam-intizamı ilə seçilir”.

Komanda.az xəbər verir ki, bu sözləri “Qarabağ”ın baş məşqçisi Qurban Qurbanov Bakıda Çexiyanın “Viktoriya” (Plzen) komandasına qarşı keçirəcəkləri UEFA Çempionlar Liqasının pley-off mərhələsinin ilk oyunundan əvvəl təşkil olunan mətbuat konfransında deyib.

Qurbanov, Çexiyada atletik futbola üstünlük verildiyini bildirib:

“Bu cür komandalara qarşı oynamışıq. Biz daha çox güc sərf etməliyik. Bakıda və səfərdə çox dözümlü olmalıyıq. İnanıram ki, futbolçular bunu bacaracaqlar. Azarkeşləri yaxşı mübarizə və oyunla sevindirmək istəyirik. Oyuna maraq da çoxdur. Azarkeşlərin inamını qoruyub saxlamaq niyyətindəyik. İnanıram ki, tərəfdarları razı sala biləcəyik”.

Avqustun 17-də keçiriləcək oyun saat 20:45-də start götürəcək.

Mehri Qurban

Bizi Telegramda izləyin