“Hər zaman ədaləti qoruyub-saxlamağa çalışırıq” – Rəşad Sadıqov

“Zirə”nin baş məşqçisi Rəşad Sadıqov Premyer Liqanın 1-ci turu çərçivəsində “Qarabağ”a qarşı keçirdikləri səfər oyunundan sonra fikirlərini bölüşüb.

Komanda.az xəbər verir ki, o, 1:0 hesabıyla qalib gəldikləri matçdan sonrakı mətbuat konfransında bunları söyləyib:

“Əlbəttə, “Qarabağ”la ilk oyunda səfərdə qarşılaşmaq istəməzdik. Amma düşündüyümüzün əksinə, bu dəfə uğurlu alındı. Birinci hissədə daha inamlı idik. Bizim hesabı açmağımızdan sonra “Qarabağ”da dəyişikliklər oldu, rəqib hücuma atıldı. Daha çox mübarizə aparıb, əks-hücumda rəqibi gözləyirdik. Narahatlıq var idi ki, 70-ci dəqiqədən sonra çatdırmarıq. 4-5 turdan sonra ideal fiziki formada olacağıq. Oyunçularım bu gün xarakter göstərdilər”.

O, “Zirə”nin “Qarabağ” üzərində qazandığı ilk qələbəsinin xüsusi hisslər yaratdığını söyləyib: “Xüsusi hiss var, amma qarışıqdır. “Qarabağ”a qarşı oyunlarda həmişə qəribə hisslər olur. Uzun illər “Qarabağ”da oynamışam. Təbii ki, bu komandaya qarşı oyunlar mənim üçün həssas olur. Aşırı şəkildə sevinc yoxdur. Biz yaxınıq, münasibətlərimiz hamıya bəllidir. Amma hər zaman ədaləti qoruyub-saxlamağa çalışırıq”.

Baş məşqçinin sözlərinə görə, transfer çalışmalarını davam etdirirlər: “1-2 oyunçu gətirmək istəyirik. Hazırda bir neçəsi ilə danışırıq. Ancaq irəliləyiş yoxdur. Alınmasa belə, bu heyətlə davam edəcəyik. Komandadan razıyam, sadəcə, heyəti genişləndirmək istəyirik. Toplanış zamanı iki hücumameyilli oyunçu zədələndi. Rəhim Sadıxov da zədələnib. Onu daha çox sol cinahda oynadacağıq. Eldar Quliyevə o mövqedə şans verdik. Hücum xəttində oyunçuya ehtiyac var”.

Rəşad Sadıqov yayda “Qəbələ”dən keçən braziliyalı müdafiəçi Ruan Renato barədə xoş sözlər işlədib: “Ruanın liderlik keyfiyyətini görürdüm. Bu, 100 futbolçudan birində olur. Ruan məşqdə, oyunda futbolçuları motivasiya etməyi bacarır. Bu da effektini göstərir”.

“Zirə”nin baş məşqçisi gərgin mövsüm gözlədiyini sözlərinə əlavə edib: “Hamımız düşünürük ki, son illərin ən gərgin mövsümü olacaq. İlk turlar da bunu göstərir. Məncə, hamı üçün maraqlı olacaq. İstərdim ki, proseslər ədalətli şəkildə getsin. Hakimlərin boynuna böyük yük düşəcək. Gərginliyi yatızdırıb, oyunu ədalətli idarə etməlidirlər. İşləri asan olmayacaq”.