Gənc sərbəst güləşçilərin Yakutsk sınağı

Həftəsonu Rusiyanın Yakutsk şəhərində sərbəst güləş üzrə olimpiya, dünya və Avropa çempionu Roman Dmitriyevin xatirə turniri keçiriləcək.

Komanda.az xəbər verir ki, gənc güləşçilər arasında keçiriləcək ənənəvi yarışda ölkəmiz də təmsil olunacaq. Gənclərdən ibarət Azərbaycan millisinin böyük məşqçisi Cəbrayıl Həsənovun rəhbərliyi altında Murad Haqverdiyev (57 kq), Sabir Cəfərov (65 kq) və Cəbrayıl Hacıyev (74 kq) turnirdə Azərbaycanı təmsil edəcək.

Hər üç güləşçi iki il əvvəl Bakıda keçirilən Avropa Gənclər Olimpiya Festivalının mükafatçısı olub. Heydər Əliyev adına İdman Arenasında keçirilən yarışda Haqverdiyevlə Hacıyev qızıl, Cəfərov gümüş medal qazanıb. Bundan başqa, Sabir yeniyetmələr arasında Avropa çempionu, Murad yeniyetmələr arasında Avropa ikincisi və dünya üçüncüsü, Cəbrayıl isə yeniyetmələr arasında dünya çempionu və Avropa ikincisi ünvanına sahib çıxıb.

Aprelin 30-da xatirə turnirində bütün çəkilər üzrə mübarizəyə start veriləcək və günün sonunda finalçılar müəyyənləşəcək. Mayın 1-də isə təsəlliverici görüşlər və medallar uğrunda qarşılaşmalarla yarışa yekun vurulacaq.