“Həmin xəbərlə biz də tanışıq, həqiqəti əks etdirmir” – “Qarabağ” rəsmisi

“Qarabağ”ın qapıçısı Luka Quqeşaşvili ilə Xorvatiyanın “Riyeka” klubunun maraqlandığına dair xəbər yayılıb. Eyni zamanda, “transfermarkt” portalına görə, keçidin reallaşma ehtimalının yüksək hesab olunduğu qeyd edilib.

Məsələ ilə bağlı “köhlən atlar”ın mətbuat xidmətinin rəhbəri Gündüz Abbaszadə ilə əlaqə saxladıq. Klub sözçüsü yazılanların həqiqəti əks etdirmədiyini bildirdi:

“Mətbuatda yazılan həmin xəbərlə biz də tanışıq, amma bu, həqiqəti əks etdirmir. Klubumuza nəinki Quqeşaşvili, heç bir futbolçumuz haqda nə rəsmi, nə də qeyri-rəsmi təklif olunub. Belə bir təklif olmadığı halda, buna münasibət bildirmək düzgün olmaz”.

Xatırladaq ki, Ağdam təmsilçisi gürcü qolkiperi ötən ilin yanvarında Polşanın “Yaqelloniya” klubundan icarəyə götürüb, həmin ilin iyulunda isə birdəfəlik transfer edib.

Rövşən Əlisoy