Azərbaycanlı hakimlər fəxri ada layiq görüldü

Gimnasika növləri üzrə ixtisaslamış bir sıra Azərbaycan hakimləri “Avropa Gimnastikasının fəxri hakimi” adına layiq görülüblər.

Komanda.az xəbər verir ki, Avropa Gimnastikasının məlumatına əsasən, sözügedən fəxri ada layiq görülmüş hakimlər sırasında bədii gimnastika, kişi idman gimnastikası və tamblinq üzrə hakimlər yer alıb.

Bunlar bədii gimnastika üzrə beynəlxalq dərəcəli hakim, Beynəlxalq Gimnastika Federasiyasının (FİG) bədii gimnastika üzrə Texniki Komitəsinin üzvü Natalya Bulanova, kişi idman gimnastikası üzrə beynəlxalq dərəcəli hakim Rza Əliyev və tamblinq üzrə beynəlxalq dərəcəli hakim Adil Hüseynzadədir.

“Fəxri Hakim” mükafatı ideyasını Avropa Gimnastikası ötən il irəli sürüb. Bu mükafat ən azı üç olimpiya dövrü ərzində Avropa gimnastikasına aid yarışların uğuruna töhfə vermiş hakimlər üçün nəzərdə tutulmuşdur.

Fəxri hakim adına layiq görülmüş bütün şəxslərə diplom və yaxa nişanı təqdim olunacaq.