“Futboldur, uduza bilərsiz, ancaq bu nəticə utancverici idi”

“Mançester Yunayted”in futbolçusu Pol Poqba son oyunlarda aldıqları uğursuz nəticələrdən danışıb.

Komanda.az İngiltərə mətbuatına istinadən xəbər verir ki, fransız yarımmüdafiəçi, “Mançester Siti” ilə qarşılaşacaqları oyunla da bağlı fikirlərini bildirib:

“Özümə və komandaya əsəbiyəm. Daha yaxşı oynamaq istəyirik və oynayacağıq. Azarkeşlərimiz bu nəticələrə layiq deyil. Onlardan üzr istəməyin tək yolu meydanda yaxşı oynamaqdır. Son turda “Everton”a 0:4 hesabıyla məğlub olduq. Futboldur, uduza bilərsiz, ancaq bu nəticə utancverici idi.

“Mançester Siti” çempionluq üçün oynayır. Bizim də əsas hədəfimiz ilk 4-lükdə olmaqdır. Çətin oyun olacaq. Eyni şəhərdən olan bir komandayla oynayırsan və qazanmalısan. Ən yaxşı komandaya, futbolçulara qarşı oynamaq yaxşı hissdir. Bu qarşılaşmanı səbirsizliklə gözləyirəm. Yaxşı oyun sərgiləyib, qələbə qazanmaq istəyirik”.

“Mançester Yunayted” – “Mançester Siti” matçı sabah, saat 23:00-da start götürəcək.