“Futbolçularımın gördüyü iş yüksək səviyyəlidir” – Sxadadze

Bu gün Azərbaycan kubokunun 1/8 final mərhələsinin növbəti oyunları baş tutub.

Komanda.az xəbər verir ki, “Qəbələ” də öz meydanında “Qarabağ”ı qəbul edib və 0:2 hesabıyla uduzub.

Oyundan sonra “Qəbələ”nin baş məşqçisi Kaxabar Sxadadze klubun rəsmi saytına açıqlama verib. Matçla bağlı fikirlərini bildirən mütəxəssis bunları deyib:

“Qarabağ” Azərbaycanda son 15 ilin ən yaxşı komandasıdır. Öz məşqçisi, heyəti, oyunçuları ilə onlar bunu sübut ediblər. Mən oyunçularıma təşəkkürümü bildirir, onlara çox sağ ol deyirəm. Çox yaxşı, çəkinmədən oynadılar. Sonadək mübarizə apardılar. Əlbəttə ki, komandalar arasında ciddi fərq var. Rəqibimizin fərdi bacarıqlarına görə bizdən güclü olan futbolçuları çox idi. Təbii ki, qarşımızdakı komanda “Qarabağ”dır, bu da normaldır. Onlar Avropada, biz isə 1-ci Liqada oynayırıq. Bir daha qeyd edirəm ki, futbolçularımın gördüyü iş yüksək səviyyəlidir. Onların əziyyətini qiymətləndirirəm və bir daha çox sağ ol deyirəm”.