Emrelinin “Nürnberq”də komanda ilə məşqlərə başlayacağı vaxt məlum olub

Azərbaycan millisinin futbolçusu Mahir Emrelinin Almaniyanın “Nürnberq” klubunda komanda ilə məşqlərə başlayacağı vaxt müəyyənləşib.

Komanda.az “Bild” nəşrinə istinadən xəbər verir ki, 27 yaşlı hücumçu sentyabrda, yığmaların beynəlxalq matçlarından sonra komandaya qoşula biləcək.

Emreli hazırda 2-ci Bundesliqa təmsilçisində reabilitasiya üzrə məşqçi Cerald Ştürzenhofekerlə birlikdə fərdi məşqlər edir.

“Nürnberq”in baş məşqçisi Miroslav Kloze azərbaycanlı forvardın yaşıl meydanlara qayıtması ilə bağlı bunları söyləyib:

“Hələlik proqnoz vermək çətindir. Həftədən-həftəyə reaksiyanın nə olduğunu görməliyik”.

Emreli “Nürnberq”lə 1 illik müqavilə imzalayıb. Onun sözləşməsinin müddəti mövsümün sonunda artırıla bilər.