Elxan Məmmədov: “Azərbaycan millisinin Avropa çempionatında iştirakı çətin görünür”

“Təbii ki, Azərbaycan millisinin Avropa çempionatında iştirakı çətin görünür. Amma inanıram ki, Türkiyə yığması Almaniyaya gedəcək”.

Komanda.az Milliyet”ə istinadən xəbər verir ki, bunu Türkiyə Futbol Federasiyasının (TFF) hesabat seçki konfransında iştirak edən FİFA-nın Avropa Milli Assosiasiyaları üzrə direktoru Elxan Məmmədov deyib.

O, “ay-ulduzlular”ı AÇ-2024-ün seçmə mərhələsində Latviya və Uelsə qalib gəlməsi münasibəti ilə təbrik edib.

Məmmədov “Mançester Siti” və “İnter” arasında keçirilmiş UEFA Çempionlar Liqasının final oyunu ilə bağlı da fikirlərini bölüşüb:

“İstanbulda futbol bayramı yaşandı. Türkiyə ən gözəl və peşəkar finallara ev sahibliyi edə bildiyini göstərdi”.

2024-cü ildə Avropa çempionatının final mərhələsi Almaniyada təşkil olunacaq.