Elmar Baxşıyev: “Ən yaxşı “Qəbələ”ni görəcəksiniz”

“Qəbələ”nin baş məşqçisi Elmar Baxşıyev evdə Kipr “Omoniya”sına qarşı keçirəcəkləri Avropa Konfrans Liqasının 2-ci təsnifat mərhələsinin ilk oyunundan öncə fikirlərini bölüşüb.

Komanda.az xəbər verir ki, 43 yaşlı mütəxəssis bu gün baş tutan mətbuat konfransında komandasının əlindən gələni edəcəyinə və yaxşı nəticə qazanacağına inandığını bildirib:

“Rəqib çox yaxşı təşkilatlanmış komandadır. Amma məni daha çox öz oyunumuz maraqlandırır. İstəyimiz daim hücumda olmaqdır. Ancaq müdafiəsiz hücum yoxdur. Lazımi nəticəni əldə etmək üçün hər iki cəhətdən daha yaxşı olmalıyıq”.

Ötən mövsümün sonunda bir çox futbolçunun komandanı tərk etdiyini xatırladan çalışdırıcı bunun normal hal olduğunu söyləyib: “İstənilən vəziyyətə hazır olmalısınız. Bu, hər bir komandanın başına gələ bilər. Keçmişlə yaşamaq istəmirik. Heyət tam komplektləşib. Hər oyunda komanda mənə istədiyimi verməyə çalışır. Keçən ildən daha yaxşı və daha iddialı olacağımıza inanıram. Ən yaxşı “Qəbələ”ni görəcəksiniz”.

Xatırladaq ki, iyulun 27-də Qəbələ şəhər stadionunda keçiriləcək oyun saat 20:00-da başlayacaq.