Dibala ərəblərə “yox” deyib

“Roma”nın hücumçusu Paulo Dibala Səudiyyə Ərəbistanından gələn təklifi qəbul etməyib.

Komanda.az “Il Messaggero”-ya istinadən xəbər verir ki, “Əl-Hilal” 29 yaşlı futbolçunu transfer etmək istəyib.

Riyad klubu “Roma”ya futbolçunun 12 milyon avroluq sərbəstqalma məbləğini də ödəməyə hazır olduğunu deyib. Eyni zamanda, ərəblər argentinalıya ciddi maaş artımı vədi də veriblər. Hazırda o, İtaliya klubunda ildə 6 milyon avro qazanır.

Argentinalı forvard “canavarlar”ın heyətində qalmaq istədiyini deyib və təklifi rədd edib.

Dibala 2022-ci ilin yayından “Roma”da forma geyinir. Onun klubla müqaviləsi 2025-ci ilin yayına qədərdir. O, 2022/23 mövsümündə 38 oyuna çıxıb, 18 qol vurub və 8 məhsuldar ötürmə edib.

Öncədən futbolçulardan Lionel Messi, Luka modriç, baş məşqçilərdən isə Joze Mourinyo Səudiyyə Ərəbistanından gələn təklifi qəbul etməmişdi.