De Byazi köməkçilərini dəyişdirdi

Futbol üzrə Azərbaycan millisinin məşqçilər heyətində dəyişiklik baş verib.

Komanda.az xəbər verir ki, baş məşqçi Canni De Byazinin köməkçilərindən Klaudio Beluççinin ardından Benito Karbone də istefaya göndərilib. Karbone bu barədə “instaqram” hesabında paylaşım edib. O, yığma komandada iki ilinin artıq başa çatdığını qeyd edərək, AFFA prezidenti Rövnəq Abdullayevə, məşqçilər heyətinə, futbolçulara və azarkeşlərə təşəkkür edib:

“Mən burada çox xoşbəxt idim. Sizin sayənizdə özümü evimdəki kimi hiss etdim, məmnuniyyət və şərəflə işimi yerinə yetirdim. Sizinlə vidalaşır və karyeramın növbəti mərhələsini səbirsizliklə gözləyirəm”.

Əvəzində yığmaya Fabio Qallo köməkçi-məşqçi təyin olunub. Mart ayında Malta və Latviya ilə yoldaşlıq görüşlərində də məşqçilər skamyasında yer almış Qallonun rəsmi debütü ötən gün Nur-Sultanda Qazaxıstanla UEFA Millətlər Liqasının ilk tur matçına(0:2) təsadüf edib.

Qallonun son iş yeri 2021-ci ilin fevralından oktyabrınadək baş məşqçi kimi çalışdığı İtaliyanın “Potentsa” komandası olub.

Hazırda baş məşqçi Canni De Byazinin köməkçiləri Fabio Qallo və Arif Əsədovdur. Kamran Ağayev millidə qapıçılarla iş üzrə məşqçi, Alessandro Skaya isə fitnes məşqçisi kimi çalışır.