“Cüzi də olsa, şansımız var, bundan yararlanmağa çalışacağıq” – Emreli

Azərbaycan millisi sabah UEFA Millətlər Liqasının son turunda səfərdə İsveç yığması ilə qarşılaşacaq.

Komanda.az xəbər verir ki, Azərbaycan millisinin hücumçusu Mahir Emreli sabah keçiriləcək oyundan əvvəlki mətbuat konfransında iştirak edib. Emeli cuzi də olsa, şanslarının olduğnu bildirib:

“Sabah güclü rəqibə qarşı oynayacağıq. Bizi çətin oyun gözləyir. Cüzi də olsa, şansımız var, bundan yararlanmağa çalışacağıq. Hər bir hücumçu üçün qol vurmaq önəmlidir. Amma mənim üçün əsas milli komandamın qələbə qazanmasıdır. Mənim vuracağım qol komandamıza qələbə qazandıracaqsa, bu, hər şeydən vacibdir. Özümü yaxşı hiss edirəm. Sabah baş məşqçimiz şans versə, əlimdən gələni edəcəm.

Son matçlarda Slovakiya millisini çıxmaq şərti ilə digər bütün oyunlarda yaxşı çıxış etmişdik. Estoniya millisi ilə də oyunda komandamı çətin vəziyyətdə qoydum. Ümid edirəm ki, sabah bunu unutduracam”.

İsveç – Azərbaycan matçı sabah saat 23:45-də start götürəcək.

Fəxri Rüstəmli