ÇL: Ən az maraq “Qarabağ”ın oyununa olub

UEFA Çempionlar Liqasının 1-ci təsnifat mərhələsinin ilk oyunlarını tribunalardan izləyən azarkeşlərin sayı məlum olub.

Komanda.az xəbər verir ki, 15 matçı ümumilikdə 101 799 tamaşaçı izləyib.

Ən çox izləyici “Astana” (Qazaxıstan) – “Dinamo” (Tbilisi, Gürcüstan) qarşılaşmasında qeydə alınıb. 1:1 hesabı ilə başa çatan görüşdə 27 328 tərəfdar olub.

“Qarabağ”ın Cəbəllütariqdə “Linkoln”ə 2:1 hesabı ilə qalib gəldiyi oyun siyahının sonuncu pilləsində qərarlaşıb. “Viktoriya” stadionundakı matçda tribunada 683 nəfər olub.

“Qarabağ”la “Linkoln” arasında cavab matçı iyulun 19-da Bakı Olimpiya Stadionunda keçiriləcək.