“Ötən həftəkindən fərqli oyun olacaq” – Qvardiola

“Mançester Siti”nin baş məşqçisi Xosep Qvardiola Çempionlar Liqasının 1/4 final mərhələsinin “Atletiko”yla cavab oyunu ilə bağlı gözləntilərini bölüşüb.

Komanda.az UEFA-nın saytına istinadən xəbər verir ki, ispaniyalı məşqçi, bu görüşün ilk matçdan fərqli olacağını deyib:

“Ötən həftəkindən fərqli oyun olacaq. “Atletiko” evdə oynayacaq və azarkeşləri tərəfindən dəstəklənəcək. Rəqib öz meydanında daha intensiv hərəkət edəcək, hücuma çıxacaq. Hesabda geri düşsək də, qələbə qazanmaq üçün əlimizdən gələni edəcəyik. Oyunda üstünlüyü ələ keçirsək, bəlkə, bir az daha müdafiədən oynayarıq”.

“Atletiko” – “Mançester Siti” matçı bu gün keçiriləcək və saat 23:00-da başlayacaq. İlk oyun İngiltərə klubunun qələbəsi ilə yekunlaşıb – 1:0.