ÇL: “Bəzən möcüzələr də olur”

“Bayern”in keçmiş futbolçusu Lotar Matteus Çempionlar Liqasının 1/4 finalında “Mançester Siti” ilə cavab oyununda münhenlilərin qalib gələcəyinə inanır.

Komanda.az “Sky Sports”-a istinadən xəbər verir ki, Almaniya millisinin keçmiş üzvü bəzən möcüzələrin baş verdiyini bildirib:

“Bəzən möcüzələr də olur. Bu, niyə “Allianz Arena”da baş verməsin? Rəhbərlik, futbolçular və baş məşqçi 0:3-dən sonra geri dönüşə inanırsa, mən də buna inanıram.

Mən tez-tez bir oyunçu kimi geri dönüşlərdə iştirak etmişəm, o cümlədən “Bayern”ə qarşı oynamışam. “İnter”lə Münhendə 2:0 qalib gəldik, sonra “Bayern” Milanda yaxşı çıxış etdi – 1:3 hesabı ilə turnirdən kənarlaşdırıldıq.

Əlbəttə ki, Tomas Tuxelin komandası üçün hər şey uyğun olmalıdır: Yan Sommer hər topu tutmalı və meydança oyunçuları hücumçu olmasalar da, çoxlu qol vurmalıdırlar”.

İlk görüş “Siti”nin 3:0 hesablı qələbəsi ilə başa çatıb. Cavab oyunu aprelin 19-da, Münhendə keçiriləcək.