ÇL: “Real” “Mançester Siti”ni finala buraxmadı

UEFA Çempionlar Liqasında yarımfinal mərhələsinin cavab oyunlarına start verilib.

Komanda.az xəbər verir ki, ilk oyun günündə “Liverpul” İspaniyada “Vilyarreal”ın qonağı olub. Yurgen Kloppun komandası ilk matçda 2:0 hesablı qələbə qazanmışdı ki, bu onları finala bir addım daha yaxın edirdi.

“Estadio de la Keramika” stadionundakı qarşılaşmanı niderlandlı Danni Makkeli idarə edib. Matça yaxşı başlayan “Vilyarreal” ilk hissəni 2:0 öndə bitirib. Amma İngiltərə təmsilçisi fasilədən sonra oyunda dönüş yaratmağı bacarıb. Buraxılan qolların əvəzini artıqlaması ilə çıxan “Liverpul” həm əzmkar qələbə, həm də finala vəsiqə qazanıb.

Bu gün isə “Santyaqo Bernabeu”da “Real”la “Mançester Siti” üz-üzə gəlib. İlk oyunda qapılara 7 qol vurulması cavab görüşünə marağı bir qədər də artırırdı. Düzdür, “Mançester Siti”nin hesabda üstünlüyü vardı. Amma “Real”ın asanlıqla təslim olmayacağı dəqiq idi. Bu oyunda da hesabı açan tərəf “şəhərlilər” olub. Lakin Madrid təmsilçisi böyük əzmkarlıq göstərərək sonda 3:1 hesablı qələbə sayəsində finala yüksəlib.

UEFA Çempionlar Liqası, yarımfinal
Cavab oyunları

3 may

Vilyarreal (İspaniya) – Liverpul (İngiltərə) 2:3
Qol: B.Dia, 3. F.Koklen, 41 – Fabinyo, 62. L.Dias, 67. Mane, 74.
İlk oyun – 0:2
Baş hakim: Danni Makkeli (Niderland)

Vilyarreal: Xeronimo Rulyi, Raul Albiol (k), Pau Torres, Xuan Foyt, Pervis Estupinyan, Daniel Parexo, Etyen Kapu, Fransis Koklen, Covani Lo Çelso, Jerar Moreno, Bulaye Dia.
Liverpul: Alisson, Trent Aleksander-Arnold, İbrahima Konate, Vircil van Deyk (k), Endryu Robertson, Fabinyo, Tyaqo Alkantara, Nabi Keyta, Dioqo Jota, Məhəmməd Salah, Sadio Mane.

Real (İspaniya) – Mançester Siti (İngiltərə) 3:1
Qol: Rodriqo, 90; 90+2. K.Benzema, 95-pen – R.Mahrez, 73.
İlk oyun – 3:4
Baş hakim: Daniele Orsato (İtaliya)

Real: Tibo Kurtua, Daniel Karvahal, Eder Militao, Naço, Ferlan Mendi, Toni Kroos, Kazemiro, Luka Modriç, Federiko Valverde, Kərim Benzema, Vinisius Junior.
Mançester Siti: Ederson, Joao Kanselo, Emerik Laport, Ruben Dias, Kayl Uoker, Bernardo Silva, Kevin de Bruyne, Rodri, Fil Foden, Qabriel Jezus, Riyad Mahrez.