“Çelsi”nin sabiq oyunçusu Türkiyə klubu ilə müqavilə bağladı

Türkiyənin “Hatayspor” klubu heyətini yeni futbolçu ilə gücləndirib.

Komanda.az xəbər verir ki, Super Liqa təmsilçisi Qana yığmasının yarımmüdafiəçisi Kristian Atsunu transfer edib.

Bu barədə klubun rəsmi saytı məlumat yayıb. 30 yaşlı vingerlə 1+1 illik müqavilə imzalanıb.

Atsu son olaraq Səudiyyə Ərəbistanının “Əl-Raed” klubunun uğurları üçün çalışıb. O, 2021-ci ilin yayından bu komandanın formasını geyinirdi. Peşəkar karyerasına Portuqaliyanın “Portu” klubunda başlamış futbolçu, 2013-cü ildə məhz bu komandadan 3 milyon avro qarşılığında “Çelsi”yə transfer olunub. Lakin o, London təmsilçisində forma şansı qazana bilmədiyi üçün 2017-ci ilə qədər müxtəlif klublarda icarədə oynayıb. Yarımmüdafiəçi “Rio Ave”, “Vitess”, “Everton”, “Malaqa” və “Nyukasl”da icarədə olub. 2017-ci ildə isə “Nyukasl” 7.5 milyon avro ödəməklə onu “Çelsi”dən birdəfəlik transfer edib. Atsu Qana yığmasında 65 oyuna 9 qol vurub.