Tuxel: “Atletiko”nu məğlub etməyin nə qədər çətin olduğunu bilirik”

“Çelsi”nin baş məşqçisi Tomas Tuxel Çempionlar Liqasının 1/8 final mərhələsində “Atletiko”ya qarşı keçirəcəkləri cavab oyunu ilə bağlı fikirlərini bildirib.

Komanda.az xəbər verir ki, UEFA-nın mətbuat xidmətinə danışan alman mütəxəssis, qələbə qazanmaq istədiklərini deyib:

“Hər komandanın öz xüsusiyyəti var. “Atletiko” Dieqo Simeonenin rəhbərliyi altında çətin məğlub olan komandadır. Onlar Avropanın yaxşı müdafiə olunan komandalarındandır. Bu, onların ən vacib keyfiyyətlərindədir. Müdafiə ilə yanaşı, topla hücuma çıxmağı və topa nəzarət etməyi də yaxşı bacarırlar.

“Atletiko” az-çox ilk oyundakı kimi oynayacaq. İlk oyunu zədə səbəbiylə buraxan futbolçuları sağalıb və komandaya qoşulub. Yannik Karrasko və Kiran Trippyenin qayıdışı komandanı daha çox cinahdan hücuma çıxarmağa kömək edəcək. Bu zaman da Markos Llorente yarımmüdafiənin mərkəzinə çəkiləcək. Komandanın taktikasında xırda dəyişikliklər ola bilər.

Bizi çətin oyun gözləyir. Səfərdə yaxşı oynayıb, üstünlük qazandıq və daha da irəli getmək üçün bunu təkrarlamalıyıq. “Atletiko”nu məğlub etməyin nə qədər çətin olduğunu bilirik. Ancaq bizim planımız budur”.

Bu gün keçiriləcək “Çelsi” – “Atletiko” matçı saat 00:00-da start götürəcək. Komandalar arasında keçirilən ilk oyunda “Çelsi” minimal hesablı qələbə qazanıb – 1:0.