“Abramoviçə bir deyil, iki xəyalımı gerçəkləşdirdiyi üçün təşəkkür edirəm” – Hazard

İspaniyanın “Real” klubuna keçidi rəsmiləşən Eden Hazard açıqlama verib.

Komanda.az xəbər verir ki, 28 yaşlı futbolçu, sosial şəbəkə hesabından etdiyi paylaşımda bunları yazıb:

“Artıq “Real”a transfer olundum. Uşaqlıqdan bu klub üçün oynamağı arzuladığım heç kimə sirr deyil. “Çelsi”dən ayrılmaq karyeram ərzində verdiyim ən böyük və ən çətin qərardır. “Çelsi”də olduğum müddətdə heç zaman başqa bir kluba getməyi düşünməmişəm. Bura gələndə 21 yaşım vardı, bir insan və bir futbolçu kimi bu klubda böyüdüm, bura Belçika millisinin kapitanı olmağa kömək etdi. Şübhəsiz ki, həm komanda, həm də mənim üçün çətin vaxtlar da oldu, amma bu, futboldur. Zəif oynadığım zamanlarda belə, inanılmaz dəstəyinizə görə təşəkkür edirəm.

“Çelsi” forması ilə bir çox unudulmaz anlarım oldu, mən hər bir mükafatın siyahısını tuta bilmərəm, amma deyə biləcəyim tək şey mükafatların, komandanın, fərdlərin inanılmaz olmasıdır. “Çelsi” və bu klubun azarkeşləri hər zaman mənim üçün xüsusi olacaq.

Klubdakı hər kəsə minnətdaram. Klubun sahibi Roman Abramoviçə isə bir deyil, iki xəyalımı gerçəkləşdirdiyi üçün təşəkkür edirəm. Birincisi, “Çelsi” futbolçusu olduğum, ikinci isə bu gün “Real”ın futbolçusu olduğum üçün”.

Peşəkar karyerasına 2007-ci ildə Fransanın “Lill” klubunda başlayan Hazard 2012-ci ildən “Çelsi”də çıxış edirdi. O, kapitanı olduğu Belçika millisində 100 oyuna 30 qol vurub.