“Çelsi” tarixi uğura imza atıb

Konfrans Liqasının ümumi mərhələsinin son oyununda “Çelsi” evdə İrlandiyanın “Şemrok Rovers” klubuna 5:1 hesabı ilə qalib gəlib.

Beləliklə, Enzo Mareskanın yetirmələri turnirin bu mərhələsində bütün qarşılaşmalarda qalib gəlib.

Komanda.az xarici KİV-ə istinadən xəbər verir ki, “Çelsi” tarixdə ilk dəfədir ki, avrokubokların qrup mərhələsinin bütün oyunlarında qələbə qazana bilib.

Londonlular 18 xal toplayıb və birinci yerdən Konfrans Liqasının pley-off mərhələsinə yüksəlib.

“Çelsi”nin bundan əvvəl ən yaxşı nəticəsi 2018/19 mövsümündə Avropa Liqasının qrup mərhələsində olub. Komanda 5 oyunda qalib gəlib, 1 dəfə heç-heçə edib.