“Çelsi” ingiltərəli futbolçuya yüksək maaşlı müqavilə təklif edir

Dortmund “Borussiya”sının gənc oyunçusu Ceymi Bayno-Gittens karyerasını İngiltərə Premyer Liqasında davam etdirə bilər.

Komanda.az xəbər verir ki, bu barədə “Pletti Goal” nəşri məlumat yayıb.

20 yaşlı futbolçu ilə “Çelsi” ciddi şəkildə maraqlanır. “Zadəganlar” Bayno-Gittensə illik 6-7 milyon avro məvacibli müqavilə təklif etməyə hazırdır. Hazırda o, Dortmund klubunda bu məbləğin təxminən yarısını qazanır.

“Borussiya” isə oyunçusunu 50-60 milyon avroya satmağa hazırdır.

İngiltərəli müdafiəçi bu mövsüm Almaniya Bundesliqasında 28 oyuna çıxaraq, 8 qol vurub və 3 məhsuldar ötürmə edib.