“Bundan sonra işimiz daha ağır olacaq” – Adil Şükürov

Azərbaycan Premyer Liqasının 21-ci turu çərçivəsində bu gün keçirilən “Kəpəz” – “Araz-Naxçıvan” oyunsonrası mətbuat konfransında meydan sahiblərinin baş məşqçisi Adil Şükürov fikirlərini paylaşıb.

Komanda.az xəbər verir ki, o, 3:1 hesablı qələbəyə sevindikləri matçı belə şərh edib:

“Allaha çox şükür olsun ki, belə vacib oyunda bizə qələbə qazanmaq nəsib oldu. Mən bütün “Kəpəz” azarkeşlərinə dəstəyə görə təşəkkür edirəm. Bura gələn və ya evdən, işdən bizi izləyənlər sevgi göstərirlər. Onların hamısının ürəyi bizimlədir. Futbolçularıma da təşəkkür edirəm. Çalışdılar ki, verilən tapşırıqları maksimum yerinə yetirsinlər. Düzdü, bəzi çatışmazlıqlar oldu. Qarşıda böyük işlərimiz var, hazırlaşmalıyıq. Azər Bağırov doğrudan da, yaxşı komanda formalaşdırıb. Onun komandaları ilə oyunlar asan keçmir. İndi də bizə böyük çətinliklər yaşatdılar. Rəqibin heyətində bacarıqlı futbolçular var. Biz standart vəziyyətlər zamanı əlimizə düşən imkanlardan istifadə elədik. Məşqlərdə bunun üzərində işləmişdik. Məşqlərdə etdiklərimizi oyunlarda reallaşdıra bilirik və bu bizi sevindirir. Bundan sonra işimiz daha ağır olacaq. Buna hazır olmalıyıq”.