“Bu vəzifəyə ondan daha uyğun məşqçi yoxdur” – Reşford

İngiltərənin “Mançester Yunayted” klubunun hücumçusu Markus Reşford açıqlama verib.

Komanda.az İngiltərə mətbuatına istinadən xəbər verir ki, 22 yaşlı futbolçu, “qırmızı şeytanlar”ın vəziyyəti və baş məşqçisi Ole-Qunnar Sulşerlə bağlı danışıb:

“Sulşerlə eyniyik, komanda üçün eyni şeyi istəyirik. O, gözəl insandır, klubun maraqları onun üçün vacibdir. Düşünürəm ki, bu vəzifəyə ondan daha uyğun məşqçi yoxdur.

Komanda olaraq son dəfə titul qazanmağımızın üzərindən xeyli vaxt keçib. Mövsümü ilk dördlükdə bitirsək, amma titul qazanmasaq, xoşbəxt olmayacam. Amma Premyer Liqada ilk dördlükdə qərarlaşsaq, eyni zamanda, kubok qazansaq, bu, bizim üçün çox yaxşı mövsüm olacaq”.

İngiltərə millisinin üzvü, cari mövsümdə bütün turnirlər nəzərə alınmaqla iştirak etdiyi 17 oyunda 9 qol, 3 məhsuldar ötürmə ilə yadda qalıb.

“Mançester Yunayted” bu mövsüm Premyer Liqada keçirdiyi 12 turdan sonra 16 xal toplayıb və turnir cədvəlinin 7-ci pilləsində qərarlaşıb.