“Bu mərhələdə ən önəmlisi nəticədir” – “Sabah”ın baş məşqçisi

“Sabah” klubunun baş məşqçisi Murad Musayev Rusiya millisinin DÇ-2022-nin seçmə mərhələsindəki çıxışı barədə yerli mətbuata açıqlama verib.

Komanda.az xəbər verir ki, Musayev, milli komandanın baş məşqçisinin futbolçuların fiziki durumuna təsir imkanının az olduğunu deyib:

“Milli komandanın baş məşqçisi futbolçuların fiziki durumuna təsir edə bilməz. Çünki onun kardinal dəyişikliklər üçün vaxtı azdır”.

“Sabah”ın 38 yaşlı baş məşqçisinin dediyinə görə, Valeri Karpinin Rusiya yığmasının “sükanı arxasına” keçməsindən sonra məşqçilər heyəti oyunlarda daha çox pressinq və standart vəziyyətlər görmək istəyir:

“Lakin indiki məqamda komandanı formalaşdırmaq daha vacib idi. Bu mərhələdə ən önəmlisi nəticədir. Milli üzvlərinin vacib məqamlarda kifayət qədər sakit oynadıqlarını gördük. Belə olanda həm müdafiədə, həm də hücumda daha çox şey alındı”.

Rusiya millisi DÇ-2022-nin seçmə mərhələsində son matçını bu gün səfərdə Xorvatiyaya qarşı keçirəcək.