“Real” ilk məğlubiyyətinə üzüldü

Futbol üzrə İspaniya La Liqasında 8-ci tura yekun vurulub.

Komanda.az xəbər verir ki, ilk oyun günündə bir qarşılaşma baş tutub. Turun açılış matçında Bilbao “Atletik”i doğma meydanda “Alaves”in müqavimətini qırmağa çalışıb. Meydan sahibləri bu oyundan minimal hesabla qalib ayrılıblar.

Şənbə günü dörd qarşılaşma baş tutub. “Kadis” – “Valensiya” matçında qapılara qol vurulmayıb.

“Osasuna” “Rayo Valyekano”nu, “Malyorka” isə “Levante”ni minimal hesabla məğlub yola salıb.

Turun mərkəzi görüşü Madriddə keçirilib. “Atletiko” bu mövsüm uğursuz çıxış edən “Barselona” ilə üz-üzə gəlib. Madridlilər bu görüşdən inamlı qələbə ilə ayrılıblar.

Lider “Real” bu turda Kataloniya təmsilçisi “Espanyol”un qonağı olub. Madrid təmsilçisi bu oyunda məğlub olmaqla cari mövsümdə ilk dəfə meydanı xalsız tərk edib. Turnir cədvəlinin 2-ci pilləsində qərarlaşan “Real Sosyedad” “Xetafe” ilə qarşılaşıb və xal itkisi ilə üzləşib. “Sevilya” isə səfərdə “Qranada”ya uduzub.

İspaniya La Liqası, 8-ci tur

1 oktyabr

Atletik – Alaves 1:0
Qol: R.Qarsiya, 44.

2 oktyabr

Osasuna – Rayo Valyekano 1:0
Qol: M.Sançes, 90+1.

Malyorka – Levante 1:0
Qol: Baba, 74.

Kadis – Valensiya 0:0

Atletiko – Barselona 2:0
Qol: Lemar, 23. L.Suares, 44.

3 oktyabr

Elçe – Selta 1:0
Qol: Benedetto, 49.

Espanyol – Real 2:1
Qol: De Tomas, 17. Vidal, 60 – Benzema, 71.

Vilyarreal – Betis 2:0
Qol: Danjuma, 45+1; 69.

Xetafe – Real Sosyedad 1:1
Qol: Ramires, 40 – Oyarzabal, 68.

Qranada – Sevilya 1:0
Qol: Roşina, 25.

Bombardir: Kərim Benzema (“Real”) – 9 qol.