“Liverpul” evdə, “Tottenhem” səfərdə xal itirdi

Futbol üzrə İngiltərə Premyer Liqasında 15-ci tura yekun vurulub.

Komanda.az xəbər verir ki, ilk oyun günündə 6 qarşılaşma keçirilib. Turun açılış matçında turnir cədvəlinin 2-ci sırasında qərarlaşan “Lester” doğma meydanda ən yaxın izləyicisi “Mançester Yunayted”i qəbul edib. Dörd qolun qeydə alındığı bu matçda qalib müəyyənləşməyib.

Turun mərkəzi görüşü Londonda keçirilib. Mövsümə uğursuz start verən və cəmi 4 qələbəsi olan “Arsenal” doğma meydanda əzəli rəqibi “Çelsi” ilə üz-üzə gəlib. London derbisində “topçular” qələbəyə sevinən tərəf olub. “Mançester Siti” isə “Nyukasl”la ev oyununda inamlı qələbə qazanıb.

Son gündə dörd qarşılaşma baş tutub. “Lids” doğma meydanda “Bernli”ni minimal hesabla üstələyib. Dörd qolun qeydə alındığı “Vest Hem” – “Brayton” matçında qalib müəyyənləşməyib.

Lider “Liverpul” bu dəfə doğma meydanda “Vest Bromviç”i sınağa çəkib və xal itkisi ilə üzləşib. Turun son matçında Joze Mourinyonun rəhbərlik etdiyi “Tottenhem” səfərdə “Vulverhempton”un qonağı olub. “Liverpul” kimi, “Tottenhem” də hesabı açdığı oyundan xal itkisi ilə ayrılıb.

İngiltərə Premyer Liqası, 15-ci tur

26 dekabr

Lester – Mançester Yunayted 2:2
Qol: Barnes, 31. Tuanzebe, 85-öz qapısına – Reşford, 23. B.Fernandes, 79.

Fulhem – Sauthempton 0:0

Aston Villa – Kristal Pelas 3:0
Qol: Traore, 5. Hause, 66. El-Qazi, 76.

Arsenal – Çelsi 3:1
Qol: Lakazette, 34-pen. Caka, 44. Saka, 56 – Abraham, 85.

Şeffild Yunayted – Everton 0:1
Qol: Siqurdsson, 80.

Mançester Siti – Nyukasl 2:0
Qol: İ.Gündoğan, 14. F.Torres, 55.

27 dekabr

Lids – Bernli 1:0
Qol: Bemford, 5-pen.

Vest Hem – Brayton 2:2
Qol: Conson, 60. Souçek, 82 – Maupay, 44. Dank, 70.

Liverpul – Vest Bromviç 1:1
Qol: Mane, 12 – Ajayi, 82.

Vulverhempton – Tottenhem 1:1
Qol: Saiss, 86 – Ndombele, 1.

Bombardir: Məhəmməd Salah (Liverpul) – 13 qol.