“Bu gün 2 xal itirdik, qələbəyə layiq idik” – Vüqar Əsgərli

“Şamaxı”nın baş məşqçisi Vüqar Əsgərli Premyer Liqanın 31-ci turunda “Kəpəz”ə qarşı keçirdikləri oyunu şərh edib.

Komanda.az xəbər verir ki, o, 1:1 hesablı heç-heçədən sonra baş tutan mətbuat konfransında bunları söyləyib:

“Ötən dövrənin yüksəlişdə olan komandasına qarşı oynayırdıq. Rəqibin heyətində yaxşı futbolçular var. “Kəpəz”in sürətli, texnikalı oyunçularına qarşı layiqincə mübarizə apardıq. Təəssüf ki, qalib gələ bilmədik. Amma qələbəyə yaxın idik. Futbolçularımıza təşəkkürümüzü bildiririk. Sona qədər mübarizə aparacağıq ki, gənc, istedadlı gənclərimizi Premyer Liqada saxlayaq. Azarkeşlərimiz də oyuna gəlmişdi. Onlara təşəkkür edirəm. Ev oyunlarında bizi tək qoymasınlar, sayları çox olsun. Çünki komandamız Premyer Liqada qalmağa layiqdir. Bu gün “Şamaxı” qələbəyə layiq idi. İki xal itirdiyimizi düşünürəm. Amma bir xal da pis deyil”.