“Bizə də məlumat verdilər, baş məşqçi gələcək” – “Neftçi”nin futbolçusu

“Bizim üçün önəmli olan UEFA Konfrans Liqasındakı matçlardır”.

Komanda.az xəbər verir ki, bunu Rusiyada təlim-məşq toplanışında olan “Neftçi”nin futbolçusu Rəhman Hacıyev klubun rəsmi televiziyasına açıqlamasında deyib.

30 yaşlı yarımmüdafiəçi hazırlıq prosesinin yaxşı keçdiyini söyləyib:

“Təzə-təzə özümüzə gəlməyə başlayırıq. Çünki komandaya sonradan qoşulan oyunçular var idi. Yeniləri də olacaq. Tam hazır deyilik, bir az vaxt lazımdır. Təbii ki, “Matç TV” turniri də vacibdir, amma ən önəmlisi avrokuboklardır. Həmin görüşlərədək tam hazır olacağıq. Bizə də məlumat verdilər, baş məşqçi gələcək. Hələlik vaxtımız var”.

Hacıyev ilk iki oyunda qapıçıların zədələnməsinin onlara təsir etdiyini bildirib:

“Emil Balayevin sıradan çıxmasına çox pis olduq, Allah ona şəfa versin. Çünki komandaya yeni gəlib və çox həvəsli idi. Aqil Məmmədovun durumu isə artıq yaxşıdır”.

Futbolçu “Zenit”ə 1:3 hesabı ilə uduzduqları ilk qarşılaşmanın birinci hissəsində yaxşı oynadıqlarını vurğulayıb:

“İkinci yarıda isə güc yox idi. Çünki komanda hazır deyildi. Ona görə də, bu, normaldır. “Zenit”in necə komanda olduğu hamıya bəllidir. İkinci oyunda “Srvena Zvezda”ya (Serbiya) 0:4 hesabı ilə uduzduq. “Fənərbaxça” ilə görüşə isə başqa cür çıxacağıq. Buna inanıram”.

“Neftçi” iyulun 15-də “Fənərbaxça” ilə üz-üzə gələcək.

Paytaxt təmsilçisi Konfrans Liqasının 2-ci təsnifat mərhələsində “Jelezniçar” (Bosniya və Herseqovina) – “Dinamo” (Minsk, Belarus) cütünün qalibi ilə görüşəcək.