“Bizi ağır Konfrans Liqası oyunları və bütöv bir mövsüm gözləyir” – Samir Abasov

“Sumqayıt”ın baş məşqçisi Samir Abasov klubun mətbuat xidmətinə açıqlama verib.

Komanda.az xəbər verir ki, Abasov hazırlıqlara iyunun 19-dən etibarən başladıqlarını bildirib:

“İki həftə ərzində məşqlərimiz daha çox fiziki yüklənmələr üzərində oldu. Bunun da məqsədi o idi ki, hazırlığın ikinci mərhələsini daha çox taktiki məşqlər üzərində çalışmağı planlaşdırırdıq. Baxmayaraq ki, bizim üçün istədiyimiz şərait yaradılıb, nəsə bir əskikliyimiz yoxdur, amma ümumiyyətlə, yay toplanışı dönəmi futbolçular üçün ağır keçir. Biz də bunun öhdəsindən layiqincə gəlməyə çalışırıq. Çünki bizi qarşıda ağır Konfrans Liqası oyunları və bütöv bir mövsüm gözləyir”.

46 yaşlı çalışdırıcı komandada ab-havanın yüksək səviyyədə olduğunu söyləyib:

“Yaxşı şəraitdə məşqlər keçdik. Hazırlıq planlarımızı demək olar ki, tətbiq edə bildik. Məlumdur ki, komandamıza 4 yeni futbolçu qoşulub. Rəhim Sadıxov daha əvvəl də bu komandada çıxış etdiyi üçün uyğunlaşma problemi yaşamadı. Əcnəbilərin komandaya uyğunlaşma prosesinin asanlaşması üçün isə həm futbolçular, həm texniki heyət canla-başla hər şeyi edirlər. Yeni transferlərimizin hər biri məşqlərdə gözəl təsir bağışlayır, lakin onların oyun üslubumuza tam öyrəşə bilmələri üçün bir neçə oyun keçirməli olacaqlarını da qeyd etməliyəm. Bundan əlavə, bəzi mövqelərə yeni oyunçu axtarışımız da davam edir. Bu prosesi hələ yekunlaşdırmamışıq. Dəfələrlə demişəm ki, hazırlıq planlarımızı sadəcə Konfrans Liqası oyunları üçün deyil, bütün mövsüm üçün qurmuşuq. Bu xüsusda çalışırıq”.

“Gənclik şəhəri” təmsilçisinin baş məşqçisi Türkiyə toplanışı zamanı keçirdikləri yoxlama oyunlarını dəyərləndirib:

“Hazırlıq oyunlarını deyərdim ki, iki hissəyə bölmək olar. İlk iki matç ağır fiziki yüklənmələrin ardından baş tutmuşdusa, son keçirdiyimiz “Adana Dəmirspor” qarşılaşması isə tamam başqa məcrada keçdi. Yoxlama oyunlarında qeydə alınan hesablar o qədər də önəmli deyil. Əsas məqsəd futbolçuların onlara verdiyimiz tapşırıqları meydanda düzgün icra etməsi idi ki, mənə elə gəlir ki, onlar bu işin öhdəsindən gələ bildilər. Təbii ki, bir sıra səhvlərimiz də oldu. Lakin mən futbolçularımı tanıyıram, onlara güvənirəm. İnşallah, avrokubok və çempionat oyunlarında bu səhvləri təkrarlamayacağıq”.

Abasov son olaraq “Sumqayıt” azarkeşləri barədə danışıb:

“Bizim üçün azarkeş anlamı tək fanat qruplarından yox, bütün Sumqayıt sakinlərindən ibarətdir. Sumqayıtlılar çətin zamanlarda bizi heç vaxt dəstəksiz qoymadılar. Stadionu doldurdular, doğma komandalarını dəstəklədilər. Biz də bunun qarşılığında uğurlu nəticələrə imza ataraq bu gün bu yerlərə gəlib çıxmışıq. İnanıram ki, “Fehervar”la oyunda, çempionat qarşılaşmalarında yenə də stadionda yerlərini alıb, bizi qələbəyə səsləyəcəklər. Bir daha vurğulayıram ki, bu yerlərə onların dəstəyi ilə gəlib çıxmışıq və bundan sonrakı uğurlarımıza da onlarla birlikdə addımlamaq istəyirik”.

“Sumqayıt” “Fehervar”la Konfrans Liqasında ilk matçını iyulun 25-də evdə, cavab qarşılaşmasını isə 31-də Macarıstanda keçirəcək.